Доналд Трамп ва Си Ҷинпин, раисҷумҳурҳои Амрико ва Чин, имрӯз, 30-юми октябр, дар шаҳри Сеули Куриёи Ҷанубӣ мулоқот карданд. Ба навиштаи расонаҳо, мавзуи асосии ин дидор, ки беш якуним соат давом кардааст, ҷанги тиҷории Амрикову Чин будааст. Ба навиштаи расонаҳои ҷаҳон, қабл аз оғози мулоқот Трамп гуфтааст, ки “як вохӯрии хеле муваффақ хоҳем дошт”, аммо дарҳол илова кардааст, ки “албатта, вай (Си Ҷинпин) як музокиракунандаи хеле сахтгир аст ва ин асло хуб нест!”. Дар посух ба ин гуфтаи раисҷумҳури Амрико Си Ҷинпин гуфтааст, “мо на ҳамеша назари якхела доштем ва ин табиист”. Роҳбарони ҳарду кишвар зикр карданд, ки сари созиш дар бораи равоити тиҷоратӣ ҳайатҳо кор мекунанд. Си гуфтааст, “ҳайатҳои тиҷоратии ду кишвар ба як “созишномаи аслӣ” расиданд” ва ӯ омода аст корро бо Трамп “барои бунёди заминаи мустаҳкам барои равобити дуҷониба идома диҳад”. Раҳбари Чин ҳамчунин аз талошҳои Трамп дар роҳи “сулҳофарӣ” дар манотиқи гуногуни ҷаҳон, аз ҷумла дар Ғазза миёни ҲАМОС ва Исроил ва миёни Тайланд ва Камбоҷа қадрдонӣ ва ситоиш карда, гуфтааст, ки “шумо ба сулҳи ҷаҳон аҳамияти хоса медиҳед ва барои ҳалли бӯҳронҳои мухталифи минтақавӣ бо шавқу ҳавас кор мекунед” ва Чин низ талош мекунад барои ҳалли бӯҳронҳои ҷаҳонӣ мусоидат кунад. Трамп гуфтааст, Вашингтон ва Пекин метавонанд “хеле зуд” як созиши тиҷорӣ имзо кунанд. Ӯ изҳор доштааст, ки дар ин нишаст масъалаи дастрасии Амрико ба маъданҳои камёб, ки Чин содироти онро маҳдуд кардааст, ҳал шудааст. Трамп илова кардааст, ки Амрико фавран таърифаҳо алайҳи молҳои чиниро коҳиш хоҳад дод, аммо нагуфтааст то чӣ сатҳ. Раисҷумҳури Иёлоти Муттаҳида, ҳамчунин, гуфтааст, ки дар масъалаи Украина ҳам бо ҳамтои чинияш гуфтугӯ кардааст ва дар ин робита як ҷо кор хоҳанд кард. Трамп гуфтааст, ки ният дорад дар моҳи апрели соли оянда ба Чин равад ва пас аз он Си Ҷинпин ҳам ба Амрико сафар хоҳад кард. Аз сӯи Чин дар мавриди мулоқоти раисҷумҳури ин кишвар бо ҳамтои амрикоияш то кунун изҳори назаре баён нашудааст. Ёдовар мешавем, ки ин нахустин мулоқоти рӯбарӯи Доналд Трамп ва Си Ҷинпин баъд аз нишасти G20 дар Осакаи Ҷопон дар соли 2019 аст. Ин дидор низ дар пасманзари ҷанги тиҷории ду кишвар, ки боиси ҷорӣ кардани боҷҳои зиёд ба молу маҳсулоти ҳамдигар шудааст, сурат мегирад. Пас аз музокироти соли 2019, Вашингтон ва Пекин ба мувофиқа расиданд, ки музокироти тиҷоратиро аз сар гиранд. Интизор меравад, ки пас аз дидору гуфтугӯи ахир роҳ барои азсаргирии музокироти густурдаи тиҷорӣ миёни ИМА ва Чин боз шавад, ҳарчанд таҳлилгарон таъкид мекунанд, ки тафовутҳои сохторӣ байни ду қудрати иқтисодии ҷаҳон, аз фанноварӣ то амнияти Тайван, боқӣ хоҳанд монд. Дар Telegram, Facebook ва Instagram бо мо бимонед.